وثبت رسول الله ساجدا | للدكتور أحمد عبد المنعم | برنامج رمضان قرب يلا نقرب- الموسم الخامس

العبادة اللي هاتكلم معاكم عنها بإذن الله هي من أهم العبادات إن لم تكن بالفعل هي أهم عبادة قال عنها النبي صلَّى الله عليه وسلم وعايزك تركز معايا، أول ما يحاسب عليه العبد يوم القيامة –إنت متخيل يعني إيه البداية يوم القيامة والبعث وإنك إنت خلاص انتقلت لعالم آخر ووُضِعت الموازين، وبعدين فجأة؛ تفاجأ أول حاجة تنادى عليها للحساب ودايما البدايات هي إما اللي بتصبر الإنسان أو بتخوف الإنسان؛ يعني إنت لما تستلم ورقة الأسئلة وأول سؤال إنت عارفه صم وعليه درجة كبيرة، بتستبشر وطاقتك الذهنية بتنقدح وتكون أكثر حماسًا لإكمال الإجابة. تخيل لو أكبر سؤال وعليه أكبر درجات معرفتوش، وكنت سايبه؟ مدى الإحباط ومدى اليأس ومدى الأثر النفسي ده عليك؛ هو ده اللي بيحصل يوم القيامة، "أول ما يحاسب عليه العبد يوم القيامة؛ الصلاة" إنت متخيل أول ما يحاسب عليه العبد يوم القيامة؛ الصلاة. الصلاة مختلفة عن كل العبادات، يكفي في اختلافها أنها فُرِضت بطريقة عجيبة جدًا، كل العبادات لما فُرِضت الله أوحى إلى النبي صلَّى الله عليه وسلم عن طريق جبريل وأمره افعل كذا أو في القرآن أو في السنة تكلم النبي صلَّى الله عليه وسلم بذلك بوحي من الله، لكن الصلاة رفعه الله إليه إنت متخيل في المعراج ثم فُرِضت الصلاة. وفُرِضت خمسين صلاة وبعد كده ظل النبي صلَّى الله عليه وسلم من رحمته صلَّى الله عليه وسلم ومن شفقة موسى عليه السلام يُراجِع ربه حتى أصبحت خمس صلوات. إنت متخيل معايا إزاي الصلاة مختلفة عن كل العبادات لدرجة أنها فُرِضت في السماء ولم تُفرَض في الأرض. لذلك الصلاة زي ماهي عبادة مختلفة في طريقة فرضها علينا، كذلك هي عبادة مختلفة في أثرها علينا. أنا أصلًا عايزك تتخيل أنا هاكلمكم بصراحة أنا أصلا مكسوف وأنا باتكلم عن الصلاة يعني لما هاجي أتكلم عن الصلاة هأقول إيه؟! هأقولك إن هي أول ما يُحاسب عليه العبد؟! "العهد الذي بيننا وبينهم الصلاة" هقولك العبادة اللي ربنا سماها إيمان "وَمَا كَانَ اللَّهُ لِيُضِيعَ إِيمَانَكُمْ ۚ " البقرة:143؟! هقولك العبادة اللي حُفَّت بمجموعة من العبادات الجميلة؛ عبادة الوضوء والطهارة كل ده أصلًا كمقدمة للصلاة. يعني عبادة حُفَّت بالأذان وبالمسجد وبالسير إلى المسجد وبصلاة الجماعة؛ عبادة عظيمة لها مكانة عظيمة عندنا في الإسلام، كفاية لفظة الصلاة في القرآن قد إيه ولفظة الصلاة في السنة قد إيه. إنت متخيل حجم الصلاة عندنا في الدين قد إيه؟ المشكلة لما آجي اتكلم عن حاجة عظيمة أنا كده ممكن أصلًا أقللها عندك، يعني الصلاة ده النَفَس يعني معقول أكلمك عن احتياجك للتنفس؟! معقول أكلمك إنت محتاج تاخد بالك من طعامك وشرابك؟! ما ينفعش أصلًا. فلما أكلمك عن الصلاة؛ لذلك أنا عايز نطلع النهاردة مش نتكلم عن الصلاة، لإن ماينفعش نتكلم عن الصلاة؛ ده بديهيات، يعني كيف يصح في الأذهان شئ إذا احتاج النهار إلى ليل؟ ماينفعش أكلمك عن أهمية حاجة هي بديهية عندك وضرورية في حياتك. معقولة أكلم شخص لازم تحب ابنك؟ معقولة أكلم شخص لازم تحب والدتك؟ إزاي؟ فلما أكلمك عن الصلاة أنا مش باتكلم على أهميتها ولا قيمتها، دي مجرد مراجعة سريعة أو مقدمة، لكن ده أمر المفروض مستقر بداخل قلب المسلم. لذلك النبي صلَّى الله عليه وسلم قال: "العهد الذي بيننا وبينهم الصلاة، فمن تركها فقد كفر"هذه علامة دي مزية واضحة علامة فارقة يوم القيامة؛ المصلين غير اللي مابيصلوش دول مختلفين يوم القيامة تمامًا. لذلك النبي صلَّى الله عليه وسلم يعرف أمته من الصلاة، من الطهارة من آثار الصلاة، ليها علامة مختلفة تماما؛ الصلاة. الصلاة هي انغماس في نهر النور لتتخلص من وحل الخطايا، الصلاة هي ظبط للوِجهة، الصلاة تجديد للعهد بينك وبين الله، الصلاة استسلام لله ومسالمة للعباد، الصلاة هي وركز معايا في المعنى ده؛ ده معنى جوهري في الصلاة الصلاة هي انتزاع للعبد من عالم المادة والشهادة إلى عالم الغيب كل يوم على الأقل خمس مرات، الصلاة انتزاع ركز معايا كده الصلاة انتزاع للعبد من عالم المادة كل يوم خمس مرات إلى عالم الغيب؛ يعني إيه؟ يعني إنت بتكون نايم في عز النوم في صلاة الفجر؛ فيأتيك الأذان قم من نومك الصلاة خير من النوم؛ حي على الصلاة حي على الفلاح، ينتزعك الفجر من نومك، ينتزعك الظهر من عملك، ينتزعك العصر من أهلك، ينتزعك المغرب والعشاء من أصدقائك.