WAYNE MANSFIELD: VAN VRUGTESMOUS TOT SUURLEMOENBOER deur Haidee Muller

Wayne Mansfield van Pniel is verlede jaar aangewys aan die Wes-Kaapse Opkomende Boer van die Jaar. Hy is nege jaar gelede deur die wynlandgoed, Fairview, genader oor 'n geleentheid om 'n suurlemoenboerdery op 'n stukkie grond op die landgoed te begin. In die tyd was hy 'n vrugtesmous wat tweedeklasvrugte gekoop, verpak en aan markte verkoop het. Vandag strek sy Fruitfield Farming se suurlemoenboorde oor 11,9 hektaar, waaruit sowat 280 ton vrugte geoes word. Sowat 80% van Wayne se suurlemoene word uitgevoer na Europa, Rusland, die Midde-Ooste en die Verre-Ooste. Hy verskaf werk aan ses permanente werkers, terwyl sy tydelike werkers bestaan uit 'n pluk- en snoeispan van sowat 40 mense.